13A / 15A / 20A / 32A等數值代表咩？ - 電制知識

已更新：3天前

成日聽到標示電力規格用「A」、「V」同「W」三種單位，究竟佢哋代表乜嘢？唔使一頭霧水！今日彩星同你深入淺出講解電力知識，等你同師傅、設計師溝通嗰陣信心十足，唔怕一舊雲！仲會教你點樣喺裝修同選購電器時做出明智選擇，確保家居用電安全又方便！💡

A = 電流（安培）

「A」係安培（Ampere），係量度電流嘅單位。13A、20A或32A 電掣嘅「A」代表電掣可以連續承載嘅安全電流。簡單嚟講，數字越大，電掣可以承受嘅電流就越高，適合用喺更高功率嘅電器。

喺裝修之前，你同師傅一定要討論清楚單位需要幾多個唔同Amp數嘅電掣，例如：

13A：香港最常見嘅Amp數，可以係3腳方型或Fuse蘇，適合一般小型家電，例如風扇、電視、吸塵機等。

15A：唔算常見，如果有只會係3腳圓型插座，通常係一匹、匹半冷氣度見到。

20A：可以係燈曲或者肚臍接線蘇，通常用喺稍高功率或起動電流較大嘅電器，例如電熱水爐、冷氣機或廚房嘅嵌入式電器（電磁爐、焗爐等）。

32A：通常係燈曲，比較少有接線蘇，用喺再高啲功率嘅電器度。

45A：可以係燈曲或龜背接線蘇，用喺再再高啲功率嘅電器度。

「V」係伏特（Volt），用來量度電壓，代表電流推動嘅「力度」。喺香港，住宅單位嘅標準電壓係220V（單相電），而一啲邨屋、豪宅、商業或工業地方可能會用到380V（三相電）。

不過，你有冇試過買外國電器（例如日本或美國貨），發現標示電壓係100V或110V？如果直接插喺香港嘅220V插座，電器好大機會即刻燒壞！所以買電器時記得檢查電壓規格，或者用變壓器（Transformer）將電壓轉換。

「W」係瓦特（Watt），香港叫法幾多火幾多火，就係講緊佢，係量度電器功率嘅單位，代表電器每秒消耗嘅能量。功率越大，電器用電量就越高。

喺選購電器時，廠商通常會喺說明書或標籤上列明電器嘅功率（W）。例如：

12W LED燈膽

1200W 吸塵機

3000W 電熱水爐

有個簡單公式可以幫到你：

電流 (A) = 功率 (W) ÷ 電壓 (V)

以香港220V電壓為例，一個3000W嘅電熱水爐需要嘅電流係：

3000 ÷ 220 ≈ 13.6A

冷氣等電器起動時可能有瞬間高電流（起動電流），計法會唔同，建議咨詢持牌電工師傅。

希望呢篇Blog幫到你！

需要選購電器材料，記得嚟我哋網店睇睇啦！