室內裝修中伏嘅4個原因

裝潢嘅費用會因為工程大小嘅唔同，由十萬至幾十萬，甚至過百萬，對於啱啱洗完一大舊錢買樓嘅人嚟講，係一筆不細嘅嘅負擔。裝修工程由設計、報價、簽約、施工到交貨，每個環節都有好多細節要注意，準備裝潢嘅人，一定要注意以下會令你裝修成品未如理想嘅4個原因。

1. 只強調設計美學 唔考慮係咪實用

我哋為自己設計新居嘅時候，好多時候會參考網上好多設計公司嘅設計，望住人哋嘅效果圖，會覺得「嘩」一聲咁靚，想將人哋嘅設計搬落自己度，呢個又想要，嗰個又想要咁。不過室內設計係一門學問，每種唔同嘅戶型，每個人對於住屋唔同嘅要求，收納嘅要求，點樣可以將呢啲實用性因素融入設計度，要考慮嘅嘢其實比想像中多。

如果犧牲咗住家裝修嘅實用面，忽略咗使用時候嘅便利性，就算最後成品幾靚都好，當實用性不足，你最後要買返啲現成嘅收納用品返嚟，最後又會破壞返本身設計個風格，得不償失。

2. 唔自己做功課 淨係聽裝修公司講

要裝飾一幅牆，可以髹油、痴牆紙、釘板、痴磁磚等等。唔同嘅做法，就有唔同嘅效果，但裝修公司往往有自己嘅考慮同堅持，會諗埋好唔好賺、易唔易做咁，一啲同你成品無關嘅考量，所以通常唔會話你知所有可能性，亦都唔一定畀到最佳嘅建議你。你一定要自己做足功課，先可以喺唔同嘅裝潢情況下提出問題，搵到最適合自己嘅解決方案。裝修前要知道嘅係，你自己先是間屋嘅主人，師傅係令到間屋更完美嘅推手，要有堅持嘅係你，對師傅言聽計從嘅人，到最後可能會後悔。

3. 裝修公司報價平 原來乜都唔包

裝修公司嘅報價如果太高，你可能會即刻唔考慮；報價如果低啲，你可能就會揀佢，簽約開工。但報價低，唔見得實好，因為師傅有可能冇將所有裝修需要嘅項目放喺報價入面，亦都可能會用比較差嘅材料，為咗達成你想要嘅整體效果，你最後都係要加呢樣加嗰樣，成盤數又變返大。所以簽約之前，一定要問清楚每一個報價上面嘅細節，邊啲嘢包，邊啲嘢唔包。最好就係諮詢下啱啱做完裝修嘅的親朋戚友，比較下價錢、報價內容，就可以大概知道報價有冇古惑嚕。

4. 覺得師傅可信 唔使咁落力跟進裝修進度

搞裝修，其實係一件令人心力交瘁嘅工作。如果你以為自己搵到一個可信嘅師傅幫你做就可以放鬆下，唔使咁落力跟進裝修進度就真係大錯特錯。首先，你好難有方法去客觀計算一個師傅究竟可唔可信，其次，有心呃你嘅第一步就係騙取你信任啦。就算搵熟人搵親戚裝修都係咁話。熟人或者親戚只係因為你識得佢比較耐，你對於佢嘅裝修手工、工作能力、責任感其實好大機會係一無所知。就算唔係有心呃你，到最後你對裝修出嚟效果或者手工不滿意，就係因為係熟人，你好難開口，心理上唔好意思去追究咁多。